Licenson, nëpërmjet Komisionit të Licencave, subjektet që aplikojnë për ushtrim aktiviteti në fushën e lojërave të fatit, sipas kritereve të ligjit.

Kontrollon dokumentacionin e personave fizikë dhe juridikë që aplikojnë për licencë ose që janë të pajisur me të, dhe kërkon dokumente e prova shtesë kur e gjykon të arsyeshme.

Mbikëqyr dhe kontrollon veprimtarinë e subjekteve që organizojnë dhe ushtrojnë lojëra fati në të gjithë territorin e Republikës së Shqipërisë, në përputhje me legjislacionin në fuqi.

Monitoron në distancë dhe në kohë reale subjektet e licencuara nëpërmjet Sistemit Qendror të Monitorimit On-line (SQMO).

Vendos sanksione në formën e masave administrative kur vëren shkelje të dispozitave ligjore.

Kontrollon dhe verifikon nëse mjetet e lojërave të fatit janë të certifikuara nga subjekte të akredituara, në përputhje me legjislacionin në fuqi.

Miraton pajisjet e lojërave të fatit sipas specifikimeve teknike të përcaktuara me udhëzim të ministrit të Financave, të pajisura me certifikata nga subjekte të akredituara.

Mbikëqyr dhe kontrollon subjektet e pajisura me autorizim për luajtjen e lojërave promocionale të fatit.

Mban regjistrin e subjekteve që ushtrojnë këtë veprimtari dhe të sallave të hapura prej tyre në të gjithë territorin e vendit — numrin e automateve/pajisjeve për çdo sallë, karakteristikat e tyre, numrin e punonjësve dhe kualifikimin përkatës, numrin e biletave të Lotarisë Kombëtare të hedhura në treg e të shitura, dhe numrin e shorteve të hedhura nga organizatori i Lotarisë Kombëtare dhe organizatorët e Bingos Televizive.

Në rakordim me Drejtorinë e Përgjithshme të Tatimeve dhe drejtoritë rajonale tatimore, verifikon shlyerjen e detyrimeve tatimore dhe deklarimet mujore të organizatorëve, sipas pikës 2 të nenit 57 të ligjit.

Kontrollon dhe verifikon deklarimet e bëra nga organizatorët pranë AMLF-së, në përputhje me detyrimet ligjore për deklarim.

Kontrollon dhe verifikon fitimet e organizatorëve nga lojërat.